Die Bildär sind jetz öi druf!

K: Wow, das isch es geils Trekking gsi, trotz dem nassu Afang!

G: Schi hensch schisch ja vorgwarnt. Äs riisu Tam Tam mächunsch hiä um denu Trek. Wenn där Typ fam Erratic Rock värzellt het, chänti mu meinu mu gege ufu Mount Everest.

K: Säg nix, ha öi gmeint, das gäbe diii Uberläbigswuchu, aber alles halb so schlimm! Ei Vorteil hets ka, äs het nisch dermassu Angscht gmacht, dass wär z Zält nit mitgnu hei und müäss sägu, da bini gli gat froh! Ha mit minum Gepäck scho gnüäg z bugglu ka, vergiss, wenn de nu di ganz Zältruschtig müäsch mitschläppu! Und ischu Glänki sind ja öi nimme gat d jungschtu, das hängi nisch de apa gibickt!

G: Glöibi öi. Darfär heiwär där ganz rucksack voll Studäntufüättär ka (nusse und getrechnuti fricht)…und alls igipackt in chüdärsäck, dass ja nit nassus chunt. Zum glick heiwär das gmacht, will där erschtusch tag hets ä rächt g’huttlut. Unglöibliche Wind, nadilstichartige Rägu, und ab und züä hets nu gschniit….abär wenn’t löifsch, hesch zum glick nit z’chalt. Isch abär scho nu lang gangu, bis wär am erschtu tag bi där hitta si gsi.

K: Ich ha’s also öi biz unnerschätzt und äs isch ja wirkli nit gat luschtig, wenn där d Fiäss ine Schüäh fascht derva schwimmund! Zum Glück isch das där einzig Tag gsi, wo wirkli so leid isch gsi! Am Abu hets de es feins z Nacht gigä, bevor wär im stiichigu fiächtu dräckigu schnarchundu 8er Zimmer einigermassu zer Rüäh sii cho (ja ich weiss, im Zält weri di besser Luft gsi – di chelteri öi, glöibet märs!).

G: Am andru Tag in die nassu, chaltu Schüä (mu hetschi nit därfu in d’hitta nä) tschliifu, het öi nu grad übärwindig koschtut…und äs het so gita, alls welti z’wättär so wittär machu wiä där vortag….und gägu ämabu hets widär ä rächt gschiffut, abär de siwär zum glück scho innär negschtu hitta gsi und hei im warmu gijoggrut (han dör sichär än paar hundärtär a gheicht…)

K: Nur zuur Erinnerig, du bisch apa 1200 Punkt oder so zrug:-) Där chilenisch Nationalpark isch übrigens wunderschön! Alls isch mega griä, rundherum di verschnitu Bärga, immer wider chunnt en See, mal en glasklare, mal en türkisfarbige und de wider en milchige. Di Bäuma gsehnt sehr speziell üs, äs het fascht kei Nadelwald, meh Löib und susch so Strücher. Tiäri heiwär nur wenig gseh, am erschtu es paar Vegil, de andru is apa öi alle z chalt gsi!

G: Schön is wirkli gsi…abär ich müäss öi sägu, wägum torres del paine älleinig miässti jetz nit hiä briche cho, da hewärs im wallis grad äso schön. Ok, wiär hei halt weniger seewjini. z’coola isch gsi, mit diär sägsch täg am stuck äso durch d’landschaft z’löifu und diär därbi di ganz zit ufu arsch z’lüägu. :=)

K: Ah drum hesch niä vor wellu und ich ha scho gmeint, du mägesch nimme;-) Ab dum drittu Tag heiwär de wunderschöns Wätter ka (Wind kehrt halt immer derzüä) und wiär hei zerscht mal d Räguhose chennu abziä! Ämabu im Refugio heiwär de der Helmut kännuglehrt, är het nisch unnerwägs scho es paar Mal uberholt. Der Typ isch unglaublich, ich ha nur gstünt ab dem, 68jährige und vor zwei Jahr ischer gat schnäll ufum Mount Everest gsi! Letschte Fritag ischer ind Antarktis gflogu, um der Mount Wilson z bistiigu und derna iner Antarktis nu  grad en Marathon zlöifu, bevor dasär widär heim zu schinum Frowerli nach Österreich fligt!

G: Gäile Siäch, där Helmut (Google nach Helmut Linzbichler). Het schisch öi supär Tips chännu gä, fär an Ertär wa wär de nu geh….und wird isch nu meh Tips züäschicku, wennär widär däheimu isch. Än Schwizär Wandärgruppa heiwär öi gitroffu, mit dume Zermatti. Där Fiärer fa dene het öi nu än schuppu Tips chännu gä, vor allem fär hiä wittär innu nordu. Sowieso luschtig, dass mu immär widär die glichu Lit atträffu tüät.

K: Jede het immer di bessru Tipps… närvt mängisch langsam öi, gseht sowiso jede anderscht, aber schi meinunds ja alli nur güät! Am 4. Tag heiwär unnerwägs en langi „Sünnelepause“ igleit (scho mit Jacku, Mütz und so), het super güät gita, wunderschön warm! Der Tag hindurch het mu immer lang Ziit zum Löifu, äs dunklut nämllich erscht so ab de 10e ämabu, wiä im Hochsommer! Am 5. Tag heiwär de der strängscht ka, der grosse Aufstieg…

G: …750 Höhumetär zu de Torres del Paine. Halb so schlimm fär iisch. Abär summi lit wa da sind än brüf gitorklut…da isch där angscht acho, ob ächt di nit jede momänt zämu klappunt. Abär där letschtusch schtutz isch de scho rächt heftig. Und de gseeht mu schi: die drii (ja driiiiii, iär mattini, nit nummu eis, driiiiii) hore.

K: Het scho saugüät üsgseh, aber z Biätschhoru gfallt mär immer nu besser:-) di Japaner Gruppu hängi wellu gseh, ob äch di irgundwenn nu obina sind acho!? Wo wiär bim z Morgu sii gsi, heinsch jedufalls fescht igiturnt und di 3 Träger instruiert:-)
Nach de Torres siwär nu z Telli veri gluffu, der Wald hängi där sellu gseh, voll wild wiäs wilder nimme geit, und so entspannend rüähig is da gsi, da isch der Wind nu Musik in den Ohren;-) (nit di ganz Ziit der Hängert vo de Turischtu).

G: Da siwär äntli mal älleinig gsi. Het güät gita. Isch de öi än lange tag gsi, wa wär mit abstand am längschtu si gluffu. Wiär hei isch öi fär der ganz trek schön där zit gla. Summi chämmunt a, gehnt sobald als möglich los, und na drii täg sinsch dur und gehnt witär zär negschtusch attraktion. Fär isch heissuts abär, das wär isch schoonu tiä (wiär miässe ja nu 10 monat ferie machu!) und darum heiwär isch 6 täg därzit gla.

K: D’Wädli, d’Chnew, d’Hüft und d’Schultre heiwär de schlussändlich glii öi ebiz gspirrt, es wohltuends Gfühl, di Muskle wider mal zgspirru! Där liäb Gili het mi de wider schmärzfrii massiert, so daswär nach 2 Täg gat numal hängi chennu vo vorna afa, diizmal natirli mit Zält:-)

G: Mit Trägär, sofort!